Murison Manuscript, p. 117; learned by Mrs. Murison from her
mother, Old Deer, Aberdeenshire.
| 1 |
There was three lords sat drinkin wine
In bonnie Aberdeen, [O]
. . . . .
. . . . |
| 2 |
Some o them talked o their merchandise,
An some o their ladies fine, [O]
But Young Allan he talked o his bonnie ship,
That cost him mony a poun.
* * * * * |
| 3 |
'Whar will I get a bonnie wee boy
That'll tak my helm in han, O
Till I gang up to my high topmast
An look oot for some dry lan? |
| 4 |
'He'll get half o my gowd, an half o my gear,
An the third pairt o my lan,
An gin he row me safe on shore
He shall hae my daughter Ann.' |
| 5 |
'O here am I, a bonny wee boy
That'll tak your helm in han
Till ye gang up to your high topmast
An look oot for some dry lan. |
| 6 |
I'll nae seek your gowd, nor I'll nae seek your gear,
Nor the third pairt o your lan,
But gin I row you safe to shore
I shall hae your daughter Ann. |
| 7 |
'Come doon, come doon, Young Allan,' he cries,
'Ye see nae what I see;
For through an through your bonnie ship-side
An I see the open sea. |
| 8 |
'Ye'll tak twenty-four o your feather-beds,
Ye'll busk your bonnie ship roon,
An as much o the guid canvas-claith
As gar gang hale an soun. |
| 9 |
'An whar ye want an iron bolt
Ye'll ca a siller pin,
An whar ye want an oaken bolt
Ye'll beat the yellow gold in.' |
| 10 |
He's taen twenty-four o his feather-beds
An buskit's bonnie ship roon,
An as much o the guid canvas-claith
As gar her gang hale an soun. |
| 11 |
An whar he's wantit an iron bolt
He's ca'd a siller pin,
An whar he's wantit an oaken bolt
He's beat the yellow gold in. |
| 12 |
The firstan shore that they cam till,
It was the shore o Linn;
They held their spears an beenits oot,
An they wouldna lat Allan in. |
| 13 |
The neistan shore that they cam till
It was the shore o . . '.;
. . . .
An they turned their ship aboot. |
| 14 |
But the neistan shore that they came till,
'Twas bonnie Aberdeen;
The fifes an drums they a' did play,
To welcome Allan in. |
| 15 |
'O where is he, the bonnie wee boy
That took my helm in han
Till I gied up to my high topmast
An lookd oot for some dry lan? |
| 16 |
'He's get half o my gowd, an half o my gear,
An the third pairt o my lan,
An since he's rowt me safe to shore
He sall hae my daughter Ann.' |
| 17 |
'O here am I, the bonnie wee boy
That took your helm in han
Till ye gied up to your high topmast
An lookd oot for some dry lan. |
| 18 |
'I'll nae seek half o your good, nor half o your gear,
Nor the third pairt o your lan,
But since I've rowt you safe to shore
I sall hae your daughter Ann.' |
