Buchan's Manuscripts, II, 182.
| 1 |
There were four-and-twenty sailors bold
Sat drinking at the wine;
There fell a rousing them among,
In an unseally time. |
| 2 |
Some there reasd their hawk, their hawk,
And some there reasd their hound,
But Young Allan reasd his comely cog,
As she floats on the feam. |
| 3 |
'There's not a ship amang you a'
Will sail alang wi me,
But the comely cog o Heckland Hawk,
And Flower o Germanie,
And the Black Snake o Leve London;
They are all gane frae me.' |
| 4 |
The wager was a gude wager,
Of fifty tuns of wine,
And as much o the gude black silk
As cleathd their lemans fine. |
| 5 |
At midnight dark the wind up stark,
The seas began to rout;
Young Allan and his bonny new ship
Gaed three times witherlins about. |
| 6 |
'O faer will I get a bonny boy
Will take my helm in hand
Ere I gang up to the tapmast-head
To look for some dry land?' |
| 7 |
'O waken, waken your drunken men,
As they lie drunk wi wine;
For when ye came thro Edinburgh town
Ye bought them shoes o ben. |
| 8 |
'There was no shoes made for my feet,
Nor gluve made for my hand;
But nevertheless, my dear master,
I'll take your helm in hand
Till ye gae to the topmast head
And look for some dry land.' |
| 9 |
'I cannot see no day, no day,
Nor no meathe can I ken;
But many a bonny feather-bed
Lies floating on the faem.' |
| 10 |
'Come down, come down, my dear master,
You see not what I see;
Through and through your bonny new ship
Comes in the green haw sea.' |
| 11 |
'Take fifty ells o the canvas broad
And wrap it in a' roun,
And as much good pich an tar
Make her go hale an soun. |
| 12 |
'Sail on, sail on, my bonny ship,
And haste ye to dry lan,
And every nail that is in you
Shall be a gay gold pin. |
| 13 |
'Sail on, sail on, my bonny ship,
And hae me to some lan,
And a firlot full o guineas red
Will be dealt at the lan's end.' |
| 14 |
The ship she hearkend to their voice
And listend to the leed,
And she gaed thro the green haw sea
Like fire out o a gleed. |
| 15 |
When the ship got word o that,
Goud was to be her beat,
She's flowen thro the stormy seas
Like sparks out o a weet. |
| 16 |
The first an shore that they came till,
It was the shore o Troup;
Wi cannons an great shooting there,
They held Young Allan out. |
| 17 |
The next an shore that they came till,
It was the shore o Lee;
Wi piping an sweet singing there,
They towed Young Allan tee. |
| 18 |
The next an shore that they came till,
It was the shore o Lin;
Wi drums beating and pipers playing,
They towed Young Allan in,
And Allan's lady she was there,
To welcome Allan hame. |
| 19 |
'O faer is my little boy,' he said,
'That I brought oer the sea?'
'I'm coming, master, running, master,
At your command shall be.' |
| 20 |
'O take to you my comely cog,
And wed my daughter free,
And a' for this ae night's wark
That ye did wake wi me.' |
