Alexander Laing's Manuscript, "Ancient Ballads and Songs,
etc., etc., from the Recitation of Old People," p. 8, 1829.
| 1 |
There was mony a braw noble cum to our king's ha,
But the bonnie Glenlogie was the flower o them a';
An the young ladye Jeanye, sae gude an sae fair,
She fancyd Glenlogie aboon a' that were there. |
| 2 |
She speered at his footman that rode by his side
His name an his surname an whare he did bide:
'He bides a[t] Glenlogie whan he is at hame,
He is of the gay Gordons, an John is his name.' |
| 3 |
'Oh, Logie, Glenlogie, I'll tell you my mind;
My luve is laid on you, O wad ye prove kind!'
He turned him about, as the Gordons do a',
'I thank [you], fair ladye, but I'm promised awa.' |
| 4 |
She called on her maidens her hands for to take,
An the rings on her fingers she did them a' break:
'Oh Logie, Glenlogie! Oh, Logie!' said she,
'Gin I get na Glenlogie, I'm sure I will die.' |
| 5 |
'O hold your tongue, daughter, an weep na sae sair,
For ye'll get Drumfindlay, his father's young heir.'
'O hold your tongue, father, an let me alane,
Gin I get na Glenlogie, I winna hae ane.' |
| 6 |
Her father wrote a broad letter wi speed,
And ordered his footman to run and ride;
He wrote a broad letter, he wrote it wi skill,
An sent it to Glenlogie, who had dune her the ill. |
| 7 |
The first line that he read, a light laugh gae he;
The next line that he read, the tear filld his ee:
'O what a man am I, an hae I a maik,
That such a fine ladye shoud die for my sake? |
| 8 |
'Ye'll saddle my horse, an ye'll saddle him sune,
An, when he is saddled, bring him to the green:'
His horse was na saddled an brocht to the green,
When Glenlogie was on the road three miles his lane. |
| 9 |
When he came to her father's, he saw naething there
But weeping an wailing an sobbing fu sair:
O pale an wan was she when Logie gaed in,
But red and ruddie grew she when Logie gaed ben. |
| 10 |
'O turn, Ladye Jeany, turn ye to your side,
For I'll be the bridegroom, an ye'll be the bride:'
It was a blythe wedding as ever I've seen,
An bonny Jeany Melville was scarce seventeen. |
