From a Manuscript copy formerly in possession of Sir Walter
Scott; communicated by the Rev. W. Forbes-Leith, through
Mr. Macmath.
| 1 |
There was a shepherd's daughter
Sheering at the bear,
And by cam the Laird o Drum,
On an evening clear. |
| 2 |
'O will ye fancy me, fair maid?
O will ye fancy me?
O will ye fancy me, fair maid,
An lat the sheering be?' |
| 3 |
'O say na sae again, kind sir,
O say na sae again;
I'm owr low to be your bride,
Ye'r born owr high a man.' |
| 4 |
Said, Fair maid, O rare maid,
Will ye on me rue?
Amang a' the lasses o the land
I fancy nane but you. |
| 5 |
'Lay your love on another,' she said,
'And lay it not on me,
For I'm owr low to be your bride,
Your miss I'll never be. |
| 6 |
'Yonder is my father dear,
Wi hogs upon yon hill;
Gif ye get but his consent,
I shall be at your will.' |
| 7 |
He's taen him to her father dear,
Keeps hogs upon yon hill,
An he has gotten his consent,
The may was at his will. |
| 8 |
'My daughter canna read or write,
She never was at school;
Weel can she milk cow and ewe,
An serve your house fu weel. |
| 9 |
'Weel can she shack you barns
And gae to mill an kill,
Saddle your steed in time o need,
And draw your boots hirsel. |
| 10 |
'She canna wear your silk sae fine,
Nor yet your silver clear;
The hue o the ewe man be her weed,
Altho she was your dear.' |
| 11 |
He's wedded the shepherd's daughter,
An he has taen her hame;
He's wedded the shepherd's daughter,
And led her on to Drum. |
| 12 |
There were four an twenty bold barons
Stood at the yet o Drum;
There was na ane amang them a'
That welcomd his lady hame. |
| 13 |
Out then spak his brother dear,
Says, Ye'v done mickel wrong;
Ye'v wedded a mean woman,
The lack o a' her kin. |
| 14 |
'I never did thee wrong, brother,
I never did thee wrong;
I've wedded a woman to work and win,
An ye hae ane to spen. |
| 15 |
'The last woman I wedded
Was aboon my degree;
I could na sit in her presence
But wi hat upon my knee.' |
| 16 |
He's taen her by the milk-white hand
An led her but an ben,
An in the ha, amang them a',
He's hailed her Lady Drum. |
| 17 |
'Now I've wedded the Shepherd's daughter,
An I hae brought her hame,
In the ha, amang ye a',
She is welcome hame to Drum.' |
