The Scots [Edinburgh] Magazine, 1829, LXXXIX, 724,
communicated by W.W.
| 1 |
Fair Marjory's gaen into the school,
Between six and seven,
An she's come back richt big wi bairn,
Between twalve and eleven. |
| 2 |
It's out then sprung her mither dear,
Stood stately on the flure:
'Ye're welcum back, young Marjory,
But ye're sune becum a hure.' |
| 3 |
'I'm not a hure, mither,' she said,
'Nor ever intend to be;
But I'm wi child to a gentleman,
An he swears he'll marry me.' |
| 4 |
[It's out then sprung her father dear,
Stood stately on the flure:
'Ye're welcum back, young Marjory,
But ye're sune becum a hure.' |
| 5 |
'I'm not a hure, father,' she said,
'Nor ever intend to be;
But I'm wi child to a gentleman,
An he swears he will marry me.' |
| 6 |
It's out then sprung her brother dear,
Stood stately on the flure:
'Ye're welcum back, young Marjory,
But ye're sune becum a hure.' |
| 7 |
'I'm not a hure, brother,' she said,
'Nor ever intend to be;
But I'm wi child to a gentleman,
An he swears he will marry me.' |
| 8 |
It's out then sprung her sister dear,
Stood stately on the flure:
'Ye're welcum back, young Marjory,
But ye're sune becum a hure.' |
| 9 |
'I'm not a hure, sister,' she said,
'Nor ever intend to be;]
Ye're but a young woman, sister,
An ye shuld speak sparinlie.' |
| 10 |
Her father's to the grene-wude gaen,
Her brither's to the brume;
An her mither sits in her gowden chair,
To see her dochter burn.
* * * * * |
| 11 |
. . . . . .
. . . . .
The sister she culd do naething,
And she sat down to greet. |
| 12 |
'Oh whare will I get a bonny boy,
That will win hose an shoon,
That wull rin to Strawberry Castle for me,
And bid my true-love come?' |
| 13 |
It's out than spak a bonny boy,
That stude richt at her knee:
'It's I wull rin your errand, ladie,
Wi the saut tear i my ee.' |
| 14 |
It's whan he cam to broken brigg,
He bent his bow an swam,
An whan he cam whare green grass grew,
Set doon his feet an ran. |
| 15 |
An whan he cam to Strawberry Castle,
He thirled at the pin,
An aye sae ready as the porter was
To rise and let him in.
* * * * * |
| 16 |
'Gae saddle to me the black,' he says,
'Gae saddle to me the broun;
Gae saddle to me the swiftest steed
That eer set fute on grun.' |
| 17 |
It's first he burst the bonny black,
An syne the bonny broun,
But the dapple-gray rade still away,
Till he cam to the toun. |
| 18 |
An aye he rade, an aye he rade,
An aye away he flew,
Till the siller buttons flew off his coat;
He took out his horn an blew. |
| 19 |
An aye he blew, an aye he blew,
He blew baith loud an shrill,
An the little life that Marjory had,
She heard his horn blaw weel. |
| 20 |
'Beik on, beik on, cruel mither,' she said,
'For I value you not a straw;
For if ever I heard my love in my life,
He's comin here awa.'
* * * * * |
| 21 |
When he cam unto the flames
He jamp in, butes and a';
He thocht to hae kissd her red rosy lips,
But her body broke in twa.
* * * * * |
| 22 |
I'll burn for thy sake, Marjory,
The toun that thou lies in;
An I'll mak the baby fatherless,
For I'll throw mysel therein. |
